8個睡眠tips
想瞓得好，請記住以下8點：
規律性 不論平日定周末，都要有規律咁瞓，睡眠時間唔規律會影響生理時鐘，自製social jet lag。每日要有7-9小時睡眠時間，睡眠時間係瞓着時間，而唔係喺床嘅時間。
要夠黑 黃昏開始，盡可能將屋入面嘅燈調暗，瞓覺時睡房亦要足夠而舒服地暗先容易入睡。如果夜晚仍然開燈開到好光，會擾亂身體分泌褪黑色素(melatonin)嘅生理時鐘。
睡房溫度大約要18.5°C 呢個溫度會令身體核心溫度下降，更易入睡，但要注意保暖，最好罯被。
避免酒精同咖啡因 酒精會整暈大腦，造成好似幫助瞓覺嘅效果，實質並非瞓覺，而且酒精會打斷睡眠週期，令你瞓得唔好；咖啡因喺成人體內嘅半衰期大約係6小時，即係身體需要6小時先可以將咖啡因分解至一半份量。咖啡因令腦部處於精神狀態，難以入睡，同時亦會打斷睡眠週期。建議最遲攝取咖啡因(飲咖啡、奶茶等等)嘅時間為中午。
唔好喺床上保持清醒 假如失眠，離開張床，喺另一個黑暗地方做啲放鬆嘅事，例如靜修，臨床實驗證實靜修可以放鬆身體同腦部，減低戰鬥或逃跑反應(fight or flight response)嘅神經系統。因失眠而有焦慮可以透過靜修去冷靜神經系統，繼而更易入睡。
臨瞓前唔好用藍光產品(LED電話、平板、電視等)，藍光會干擾褪黑色素，令大腦以為仲係日頭。褪黑色素係提醒大腦要瞓覺嘅荷爾蒙，喺睡前2-3小時就會喺大腦松果體(pineal gland)製造出嚟。
下晝3點或之後唔好瞓晏覺。瞓覺有修復身體嘅作用，太晏瞓晏覺會到夜晚仍然都精神，令夜晚更難入睡。瞓晏覺可以試吓瞓大約20分鐘嘅power nap，可以保持頭腦精醒，精神更集中，唔會因瞓得太耐而迷迷糊。
睡前3小時唔食嘢 夜食會提升睡前嘅代謝率，亦提升靜態心率，導致難以入睡。