白髮變黑秘訣！
已更新：2022年12月30日
天生有一執金毛，直至出嚟做嘢執金毛漸漸消失，到最近金髮又生返出嚟，令我諗起2021年一個有關頭髮嘅研究。
頭髮顏色取決於melanin呢種天然色素嘅數量。Melanin分兩種：eumelanin同pheomelanin。Eumelanin係黑色同啡色，愈多呢種色素，頭髮顏色愈深。Pheomelanin調節頭髮有幾紅，愈多呢種色素，頭髮顏色愈紅，但如果同時eumelanin亦好多，可能會被深色髮色蓋過而顯示唔到。
下面條片嚟自個研究，係一條頭髮唔同位置嘅顏色，透過頭髮生長速度推算返唔同頭髮顏色嘅時間，發現經歷一啲壓力事件之後，頭髮會變白，反映壓力可以導致某程度嘅衰老。但係，經歷一啲放鬆事件之後，白髮又可以變返黑。
https://www.youtube.com/watch?app=desktop&v=p0K4MDnYD94&feature=youtu.be
結論係：壓力可以導致頭髮變白，只要未去到返唔到轉頭嘅臨界點，白髮係可以變返黑。
預防衰老嘅一個關鍵係點樣面對壓力。或者壓力係避免唔到，但減壓嘅方法有好多，分享4個有效嘅減壓方法畀大家：1. 運動 2. 瑜伽 3. 靜修 4. 接觸大自然。
運動、瑜伽同接觸大自然都好易理解，運動可以係跑步、打波、游水等等，瑜伽最有效係減壓效果，接觸大自然可以去行山、跑山。靜修比較少人認識，作為Holistic Health Method五大支柱之一，喺度簡單介紹點樣開始靜修，特別係畀啲好靜人士。
以下4點係靜修嘅必備條件：
一個寧靜嘅地點，愈少干擾愈好。
一個舒服嘅位置，例如坐姿/瞓低。
集中注意力喺一樣嘢，例如自己嘅呼吸、唱頌梵咒或者望實一樣物品。
一個開放嘅態度，由得干擾自然咁來來去去，唔去評價、批判佢地。
如果有啲舒服嘅音樂墊底，可能會幫你更易進入靜修狀態，網上大把呢啲免費資源，可以好好利用。
如果想有較理想嘅減壓效果，建議每日做1-2次，每次10-20分鐘，最好朝早瞓醒做。壓力荷爾蒙皮質醇(cortisol)喺瞓醒後30分鐘會上升到全日高位，稱為cortisol awakening response (CAR)。瞓醒就靜修可以降低皮質醇高峰水平，對長期過著高壓生活嘅人特別好。部分人臨瞓前做可以瞓得更好，但亦有人會因為頭腦變得清晰而難以入睡，需要按照自身情況決定好唔好臨瞓前靜修。